KORONADAL CITY– Nagbilin sang 13 ka patay ang Hurricane Michael sa Gulf Coast sang Estados Unidos sa padayon sini nga pagpanalasa.
Nahibaluan nga kasamtangan nga gindalasa ang dako nga bahin sang North kag South Carolina matapos sini nga bayuhon ang estado sang Florida nga nagbilin sang 7 ka patay samtang 6 naman sa Carolina kag posible nga madugangan pa.
Suno kay Bombo International Correspondent Honey Tabelisima Stewart nagatrabaho sa isa hospital sa Port Orange, Florida madamo sang mga Overseas Filipino Workers ang apektado sa nasambit nga mabaskog nga bagyo kun diin kalakip ang mga ini sa pila ka mga residente nga naguba ang puluy-an matapos nga matumbahan sang dalagko nga puno sang kahoy , may mga business establishments man nga naguba kag pila ka mga residente nga nagpakatig-a sa pagbakwit.
Sa nasambit nga kalamidad ginkilala naman ang Coast Guard bangud sa pagluwas sang madamo nga kabuhi nga kasamtangan nga search and rescue missions.
