KORONADAL CITY – Kumpiyansa si anay PNP chief kag kasamtangan nga Bureau of Corrections chief Ronald “Bato” dela Rosa nga indi magmadinalag-on ang plano sang mga komunista nga grupo kag oposisyon nga pahalinon si Pangulong Rodrigo Duterte sa iya pwesto.
Ginhimo ni dela Rosa ang pahayag sa pagsaulog sang 18th Charter Anniversary kag 8th Negosyo Festival diri sa siyudad sang Koronadal bilang dinapit nga bisita.
Suno sa BuCor chief, bug-os ang iya pagpati nga wala sang pakadtoan ang plano sang mga ini nga pahalinon sa Pangulong Duterte base sa ginaplano suno pa nga Red October ouster plot bangud palangga ini sang mga kasuldadohan, mga kapulisan kag kadam-an sang mga ordinaryo nga pumuluyo.
Mas hugot man ang pagpatuman sang mga operasyon kontra ilegal nga droga, rason nga nalikawan nga mangin isa ka narco-state ang Pilipinas.
Wala man sini ginpanginwala nga may nabaton sila nga mga pamahog sa kabuhi, apang ginpromisa sa gihapon nga pagahimoon nila sa gihapon ang ila mandato agud mapabilin nga maayo kag luwas batok sa mga malain nga mga elemento ang pungsod.
