KORONADAL CITY- Ginakahadlukan nga magsaka pa sa 5,000 ang patay makaligad ang nagluntad nga magnitude 7.5 nga linog sa Palu, Indonesia nga ginsundan sang tsunami.
Sa interbyu sang Bombo Radyo Koronadal kay Bombo International Correspondent Doula Alep Rustiano nga isa ka social worker kag kasamtangan nga nagabulig sa mga apektado nga residente sa lugar, nagapaninguha sa karin ang Indonesian National Board for Disaster Management nga marekober ang nilibo pa nga mga residente nga biktima sang killer quake.
Posible man suno pa nga magsaka pa sa masobra 5,000 ang patay bangud sa mga lugar nga nalumos bangud sa tsunami kasubong sang Petobo kag Balaroa nga may nilibo katawo nga naga istar nga tubtob sa karun wala pa napadulungan sang mga rescuers bangud kasubong nga napanas ini sa mapa sang gindalasa sang tsunami.
Samtang padayon sa gihapon ang panawagan sang mga residente sang mga mainom nga tubig, pagkaon kag bulong.
Nahibaluan nga tubtob sa karun madamo sa gihapon sang mga bangkay nga nagalapta halin sa mga nagtiphag nga mga edifisyo.
Nahibaluan nga naglab-ot na ang death toll sa halos 2,000 kag mas nagdamo pa ang panginahanglanon sang mga survivors.
