KORONADAL CITY – Magapatigayon sang profiling ang Muslim Affairs sang South Cotabato agud mamonitor ang anuman nga aktibidad sang mga tawo sa kada barangay labi na sa mga ginakabig nga Muslim community.
Ini ang ginakumpirmar ni Muslim Affairs Chief Sultan Mutalib Sambuto sa interbyu sang Bombo Radyo Koronadal.
Suno kay Sambuto mas maayo man nga ang ginaduso nga ID system sang gobyerno agud nga mas mahapos nga makilala ang mga kriminal ukon sin-u-man nga mga katapu sang terorista nga grupo kasubong sang ISIS.
Wala suno pa ginalauman ni Sambuto nga makaangkon sang kuta ang terorista nga ISIS sa South Cotabato nga amo ang nangin target sang operasyon sang mga otoridad sang nagligad nga adlaw kun diin may nakuha pa nga mga ISIS flags kag nagkalain-lain nga component sa paghimo sang bomba.
Kadungan sini, nagpanawagan naman si Sambuto sa mga utod nga Muslim sa probinsiya nga magsunod sa layi kag indi pag-suportahan ang anuman nga mga terroristic activity agud nga mapabilin ang kalinong sa Mindanao.
