KORONADAL CITY- Ginatutukan subong sang Koronadal City PNP ang nagluntad nga pagpang ambush nga ginkapilas sang isa ka ambulance driver sang Polomolok Municipal Hospital kag ginkapatay sang pasyente nga dala sini.
Sa imbestigasyon, nagluntad ang insidente sa Marañon subdivision, Brgy. Zone III, Koronadal City kun sa diin ginkilala ang napatay nga si Arlan Madulangat, 45 anyos kag residente sang Prk Kalamunding, Brgy. Lapu sa banwa sang Polomok samtang pilason naman ang driver sang ambulansya nga si Dexter Jordan, 40 anyos kag residente sang Brgy Palkan sa nasambit nga banwa.
Nagwa sa imbestigasyon nga padulong sa South Cotabato Provincial Hospital ang ambulansya sang ginbalabagan ini sang isa ka puti nga van nga sakay ang mga armado nga kalalakihan kun sa diin una pa nga ginpamangkot sang mga suspek ang iloy sang biktima kun sin-o ang pasyente kag sang ginmensyunar sini ang pangalan sang biktima gulpi nalang ini ginluthang mangin ang driver.
Apisar pilason, nahimo pa ni Jordan nga ibyahe ang ambulansya sa Provincial Hospital apang gindeklarar na nga dead on arrival si Madulangan.
Hugot naman nga ginkondinar ni South Cotabato Governor Daisy Avance-Fuentes ang panghitabo.
