KORONADAL CITY- Ginapreparahan na sang Indonesian Government ang ginapatigayon nga Mass Burial kasunod sang pag-igo sang Magnitude 7.5 nga linog sa Palu, Sulawesi, Indonesia nga ginkapatay sang yara sa 1,000 katawo kag masobra 500 naman ang missing.
Sa ekslusibo nga interbyu sang Bombo Radyo Koronadal kay Mr. Elmer Decina, Overseas Filipino Worker kag isa ka manunudlo sa Manado, Indonesia International School, masubo ang bug-os nga pungsod bangud sa nag-igo nga kalamidad kun sa diin ginlaragway sini nga devastated ang mga apektado nga rehiyon sang Sulawesi kasubong sang Palu kag Donggala island.
Nahibaluan nga prayoridad subong sang gobyerno sang Indonesia amuh ang pagpalubong sang mga patay bilang kabahin sang Islamic Funeral Tradition kag agud malikawan nga maglapta ang nagkalain-lain nga sahi sang balatian bangud sa amat-amat nga pag-agnas sag mga bangkay.
Target ang paghimo sang mass grave nga kaigo ang yara sa 300 ka mga bangkay samtang nagapadayon sa gihapon ang search and retrieval operations.
