KORONADAL CITY- Ginbuyagyag sang mga otoridad nga kalakip ang 3 ka napatay nga suspek sa listahan sang high value target sa banwa sang Sto Nino.
Ini ang ginkumpirmar ni PSI Jincint Aput, hepe sang Sto. Niño PNP sa esklusibo nga interbyu sang Bombo Radyo Koronadal.
Suno kay PSI Aput, kalakip ang pangalan nanday Dennis kag June Jay Cabantud, Ronnie Magon kag Muhammad Moso sa mga high value target sa probinsya sang South Cotabato.
Samtang nagpanindugan ang mga otoridad nga lehitimo ang ila ginpatigayon nga operasyon sa Purok Malipayon, Brgy. Ambalgan.
Nahibaloan nga sa nasambit nga operasyon, patay ang mag-utod nga Cabantud kag Ronnie Magon makaligad magbato sa Regional Police Drug Enforcement Unit kag South Cotabato Mobile Force Battalion samtang nakapalagyo si Muhammad Moso.
Narekober naman sa mag-utod nga Cabantud ang 14 ka sachets sang suspected shabu kag armas luthang.
Nakuha naman sa posisyon ni Magon ang 7 small sachets sang shabu, drug paraphernalia kag armas luthangl.
Suno naman sa kaupod sang pamilya Cabantud nga si Marifel Salmorin nga yara didto sang magluntad ang operasyon, nagapati ini nga wala nagbato ang nasambit nga mga suspek kag ginapatihan nga may nadula man suno pa sila nga kwarta makaligad ang operasyon.
