KORONADAL CITY- Ginpasakaan na sang kaso nga paglapas sa Republic Act 9165 ukon Comprehensive Dangerous Drugs Act of 2002 at Republic Act 10591 ukon illegal possession of firearms and ammunition ang isa ka suldado nga ginapatihan nagduso sang illegal nga droga matapos madakpan sa ginpatigayon nga operasyon sang gintingob nga pwersa sang PDEA 12, Pigcawayan PNP kag 34th IB Philippine Army sa Prk. 5, Brgy. Capayuran, Pigcawayan, North Cotabato.
Sa impormasyon nga nakuha ng Bombo Radyo Koronadal,ginkilala ang nadakpan nga suspek nga si Sgt. Teddy Cogo Paltinca, 42 anyos, may asawa kag aktibo nga miyembro sang 34th Infantry Battalion sa Midsayap, North Cotabato.
Sa ginpatigayon nga operasyon sa puluy-an sang suspek narekober ang 8 pakete sang ginapatihan nga shabu, drug paraphernalia, nagkalain-lain nga dahi sang armas, bala kag kwarta nga nagakantidad sang P76,000.
Ginpanginwala naman sang suspek ang mga nakuha sa posisyon sini apang labaskog ang ebidensya batuk sa iya.
Sa subong yara na sa kustodiya sang PDEA Regional Office 12 Detention Facility.
