KORONADAL CITY – Padayon ang paglagas sang mga otoridad sa tatlo ka suspek nga ginapatihan nga nagbilin sang bomba sa isa ka videoke bar sa Brgy Poblacion 4 sa banwa sang Midsayap, North Cotabato.
Sa ekslusibo nga interbyu sang Bombo Radyo Koronadal kay PSupt. Bernard Tayong, ang tagpamaba sang Cotabato Provincial Police Office, nga base sa report, alas 7 kagab-i nagsulod ang tatlo ka tawo sa Theresa’s Place videoke bar kun sa diin nag-order sila sang beer kag gilayon nga naghalin antes nagluntad ang pagsigabong makaligad ang 15 minutos.
Maswerte na lamang suno pa kag wala sang may napilasan ukon namatay sa insidente apang nagtuga ini sang kahadlok sa mga pumuluyo.
Subong nga adlaw magapatigayon sang maid-id nga imbestigasyon ang mga otoridad kag pagalantawon kun nakita ba sang CCTV camera ang nasambit nga insidente.
Indi man mahambal sa subong sang opisyal kun terorismo ang nagluntad bangud ginalantaw man sang mga kapulisan ang iban nga anggulo kasubong sang extortion.
Sa pihak sang natabo, ginpasiguro ni Tayong ang mas hugot nga seguridad seguridad kag pagpatrolya agud masiguro ang kaluwasan sang mga pumuluyo.
