KORONADAL CITY- Nakatalana na nga pasakaan sang patung-patong nga kaso sa magasunod nga semana ang mga suspek sa likod sang una nga pagpasigabong sang Improvised Explosive Device (IED) sa banwa sang Isulan, Sultan Kudarat partikular na sa Brgy. Kalawag 3 sa tunga sang 7th Hamungaya Festival kag 61st Foundation anniversary nga ginkapatay sang 3 ka persona kag yara sa 30 naman ang pilason.
Ini ang ginpahayag ni PSupt. Aldrin Gonzales ang tagpamaba sang PNP Regional Office 12 sa ekslusibo nga interbyu sang Bombo Radyo Koronadal kun sa diin ginpahayag ni Gonzales nga may yara na sila sang natumod nga mga suspek apang nagpamalibad anay nga isapubliko bangud wala pa natapos ang imbestigasyon sang Special Investigation Task Group.
Samtang sa insidente naman sang pagsigabong sa isa ka internet shop sa Brgy. Kalawag 2 nga nagbilin sang 2 nga pataya kag 15 nga pilason, mahalong sa gihapon ang ila pag tsekyar ilabi na sa CCTV footage sa nagluntad nga bombing kag gina-imbestigaran naman ang impormasyon angot sa foreign looking individuals nga nasiplatan sa nasambit nga banwa bag-o ang nagluntad nga ikaduha nga pagpamomba.
Sa karun yara sa gihapon sa full alert status ang rehiyon tubtob may pamahog pa sang terorismo sa lugar.
