KORONADAL CITY – Yara na sa kustodiya sang mga otoridad ang isa sa mga suspek sa pagpangluthang-patay sa anay Social Action Worker sang Sto. Niño Parish sa banwa sang Tampakan, South Cotabato.
Ginkilala ni Police Senior Inspector Rafael Bangay, hepe sang Tampakan PNP, ang suspek nga si Ariel Malid Evangelista nga residente sang Sitio Datal Biao Brgy. Danlag, Tampakan, South Cotabato.
Suno kay Bangay, si Evangelista ang suspek sa pagpatay sa church worker nga si Domingo Edo sang Agosto 19, 2017 samgtang nakaluwas naman apang pilason ang convent boy nga kaupod sini nga si Ramil Piang.
Madumduman nga padulong kunatni sa isa ka Bible service sa Sitio Bong Mal ang duha sang ginbalabagan sang mga suspek sa bahin sang Barangay Danlag.
Gilayon naman nga ginpaidalom sa interogasyon ang suspek agud nga hibaluon ang ginapanaguan sang kaupod sini nga nagluthang sa mga biktima.
