KORONADAL CITY – Liwat nga ginbulabog sang bomb scare ang mga pumuluyo sang banwa sang Isulan, Sultan Kudarat partikular na ang isa ka pampubliko nga buluthuan makaligad nga mareport sa kapulisan ang suno pa isa ka abandonado nga nga motorsiklo pasado ala una kaina sang hapon.
Ini ang ginkumpirmar sa Bombo Radyo Koronadal ni Pol. Supt. Junie Buenacosa, hepe sang Isulan PNP.
Suno kay Buenacosa, gilayon nga nagresponder ang EOD team sa guwa sang Isulan National High School kag nangin negatibo sa IED.
Aminado naman si Buenacosa nga nagpanic ang mga estudyante ang manunudlo sa nasambit nga buluthuan apang wala naman nagpalauli ang mga ini matapos nga masiguro sang kapulisan nga luwas na ang lugar kag negatibo sa anuman nga eksplosibo.
Nahibaluan nga ginpatigayon man kaina sang aga ang prayer rally sa nasambit nga lugar 3 ka adlaw matapos ang ikaduha nga pagsigabong sang IED nga nagbilion sang 2 ka patay kag 15 ka mga pilason.
Ang nasambit nga prayer rally ang gintambungan sang mga estudyante kag manunudlo gikan sa nagkalain-lain nga buluthuan.
Naobserbahan man nga yara gihapon sa half mast ang hayahay sang mga buluthuan kag mga pampubliko nga talatapan sa nasambit nga banwa.
