KORONADAL CITY- Ginatawag nga Bold Leadership sang mga hudyo ang pagpamuno ni Pres. Rodrigo Duterte sa Pilipinas kaangot sa pagbisita sang presidente sa Israel nga nagsugod na kahapon nga adlaw.
Sa ekslusibo nga interbyu kay Cheryl Abenoja, isa ka caregiver sa sulod na sang 13 ka tuig sa Tel Aviv, Israel kag isa sa mga Pilipino nga nagbantay kag nagsugata sa Presidente, ginakabig nga historical sang mga Hudyo ang pagbisita san presidente sang Pilipinas sa Israel bangud humalin sa pagpaungko sang presidente, gintutukan na sang mga ini ang iya pagpamuno.
Samtang sa pihak nga bahin, nagpatigayon sang vigil rally ang mga nagkalain-lain nga grupo sang mga OFW’s sa Jerusalem agud ipakita ang suporta sa presidente kag i-welcome ini sa Israel.
Ginalauman naman sang mga OFWs nga pagatalakayon nanday Pres. Rodrigo Duterte kag PM Benjamin Netanyahu ang problema sang Pilipino sa tuman ka mahal nga placement fee sa nasambit nga pungsod kag ang sitwasyon sang mga Pilipino ilabi na ang mga illegal workers sa Israel.
