KORONADAL CITY- Opisyal na nga ginpagwa sang PNP ang Computerized facial composite sang suspek sa Isulan Bombing kun sa diin ginlaragway sang mga testigo bilang responsable sa pagbutang sang IED malapit sa “Ukay-Ukay” store sa Brgy. Kalawag 3, Isulan, Sultan Kudarat sang August 28, 2018 nga nagbilin sang 3 patay kag 36 naman ang napilasan.
Ini ang ginkumpirmar ni PSUPT Aldrin Gonzales, Spokesperson PNP 12 sa intebryu sang Bombo Radyo Koronadal.
Suno kay PSUPT Gonzales, nagpatigayon sila sang press conference kun sa diin ginpagwa ni ni PCSupt Eliseo Tam Rasco, PRO 12 Regional Director ang opisyal nga CFC sang suspek.
Ginlaragway ang ginapatihan nga bilang isa ka lalaki, yara sa 20 to 25 anyos, 5′ 6″ to 5’7” ang kataason kag may kabug-aton nga 55 to 60 Kgs, tama-tama ang kadakuon kag may white complexion.
Sa nagapadayon nga imbestigasyon sang Special Investigation Task Group (SITG) “Hamungaya”, nagagwa nga ang suspek ang nagbilin sang Improvised Explosive Device usar ang cellular phone nga may Nine (9) volts battery power source bilang triggering device.
Nagagwa man sa imbestigasyon nga ginbilin ang nasambit nga IED malapit sa isa ka motorsiklo nga naka-park sa atubang sang isa ka establishemento malapit sa ukay-ukay area.
Nagapati man ang mga otoridad nga indi naga-isahanon ang suspek sa pagplano sa nasambit nga pagpasigabong.
Kaangot sini, yara naman sa full alert status ang PNP sa bug-os nga Mindanao kasunod sang natabo nga pagpasigabong sa banwa sang Isulan kag ginpasiguro nga mahatagan sang hustisya ang mga biktima.
Sa karon, ginahingyo sang PNP ang bulig kag kooperasyon sang publiko sa gilayon nga pagresolbar sang kaso.
Madumduman nga una na nga nagcirculate sa social media ang isa ka laragway sang ginapatihan nga suspek ng Isulan Bombing, butang nga hugot nga ginpanginwala sang PNP.
