KORONADAL CITY- Nagapatigayon na subong sang madalom nga imbestigasyon ang Sultan Kudarat PNP agud matumod ang mga yara sa likod sang pagpasigabong sang Improvised Explosive Device sa tunga sang selebrasyon sang 7th Hamungaya Festival kag 61st Foundation anniversary sang Isulan, Sultan Kudarat kagab-i.
Kaangot sini, nagpatigayon naman sang closed-door meeting ang mga otoridad kaupod si Mayor Marites Pallasigue angot sa nasambit nga pagpasigabong kag ang ila magasunod nga tikang.
Samtang sa pihak nga bahin, dako naman ang mabulig sang pila ka mga bombing survivors sa dalagan sang imbestigasyon ilabi na ang isa ka MSgt. Capilitan halin sa 39th ib bangud naitsuraan suno pa sini ang isa sa mga suspek kag nakig shake hands pa ini sa iya kag nagtanyag pa sang prutas.
Ginasiling nga nagahambal ang suspek sang ginlakot nga binisaya kag tagalog, may mabakod nga lawas kag mahamis nga kutis.
Nahibaluan nga madasig suno pa nga nakapalagyo ang mga suspek bangud may yara sila sang getaway vehicle nga naka standby malapit sa ginluntaran sang pagsigabong nga nagbilin sang 40 nga pilason kag 2 naman ang patay.
Nakatalana nga magpagwa sang opisyal nga impormasyon ang PNP anuman nga oras subong nga adlaw samtang nagpanawagan naman sang pagpangamuyo si Mayor Marites Pallasigue para sa mga biktima sang pagpamomba sa ila nga banwa.
