KORONADAL CITY – Nagresulta sa kamatayon sang isa ka estudyante samtang kritikal naman ang isa pa makaligad nga maglumpat sa ginasakyan nga multicab sa banwa sang Midsayap, North Cotabato.
Sa report sang Traffic Management Unit, nakilal-an ang napatay nga si Hashnah Guini, 16 anyos nga residente sang Barangay Salunayan sa nasambit nga banwa samtang yara naman sa kritikal nga kondisyon sa balay bululngan ang kaupod sini nga si Manisan Acob, 16.
Suno sa driver sang multicab nga si Adan Ampang, 43, ginpara ini sang mag-abyan sa bahin sang Barangay Salunayan samtang padulong sa Datu Piang.
Nakibot na lang suno pa ini sang gulpi na lamang nga naglumpat ang 2 sa una nga bahin sang Barangay Salunayan samtang madasig naman nga nagadalagan ang multicab.
Kasubong nga may nakit-an suno pa nga kakilala ang mga ini rason nga naglumpat nga wala ginapara ang salakyan.
Tuman nga pagkalampos sang ulo ni Hashnah nga nangin tunaan sang iya kamatayon samtang nag angkon naman sang mga pilas si Manisan.
Aminado naman ang pamilya sang duha nga wala sang sala ang driver bangud ang mga bata ang naglumpat samtang nagadalagan ang salakyan.
