KORONADAL CITY- Nagtuga sang tuman nga kahadlok sa mga pumuluyo sang Tacurong City ang asud-asod nga insidente sang pagpangluthang sang riding-in-tandem.
Sa ekslusibo nga interbyu sang Bombo Radyo Koronadal kay PSupt. Joefel Siason, hepe sang Tacurong City PNP, patay sa pagpangluthang ang isa ka Maximo Manaay, 43 anyos nga residente sang Prk Rose, Brgy San Antonio sang nasambit nga syudad kun sa diin ginluthang ini samtang yara sa isa ka tindahan sa Brgy. Buenaflor.
Ginsundan man ini sang isa pa ka insidente sang pagpangluthang alas 7 sang gab-i sa kasubong man nga barangay kun sa diin ang biktima nga si Keith Deliomez, 36 anyos ang ginluthang mismo sa atubang sang iya 3 ka mga kabataan kag nagpakitluoy pa ang 10 anyos nga bata sini sa mga suspek nga indi pagpatyon ang amay apang wala sang nahimo.
Samtang una na nga ginluthang sang mga ginapatihan nga riding-in-tandem ang isa ka babaye ngga manunudlo nga si Annaliza Capinpin 33 anyos nga residente sang EJC Montilla, Tacurong City.
Nahibaluan nga ang 3 ka insidente sang pagpangluthang sang riding-in-tandem ang napagkit sa sulod lang sang isa ka adlaw.
