KORONADAL CITY- Emosyonal nga nagpanawagan sang hustisya ang fiance sang isa ka 22 anyos nga babaye nga ginluthang patay sang riding-in-tandem sa Brgy. GPS syudad sang Koronadal.
Sa ekslusibo nga interbyu sang Bombo Radyo Koronadal kay Jason Araquil, 22 anyos , tuman ka sakit para sa iya ang gindangatan sang fiance sini nga si April Joy Jaballa makaligad ini nga ginluthang sang riding-in-tandem samtang padulong sa coffee shop kun sa diin ini nagatrabaho agud sugaton.
Nahibaluan nga 5 ka tuig na sila nga nag-updanay kag nakatalana na kun tani nga kaslon ang mga ini sa palaabuton nga bulan sang Nobyembre subong nga tuig apang indi na madayon pa ang ila handum nga pagpakasal makaligad ang krimen.
Ginlaragway sini nga maayo nga tawo si April kag sa kalawig sang ila pag-updanay, wala ini sang nakit-an nga rason nga makaangkon ini sang kaaway.
Sa kada madumduman sini ang gindangatan sang iya pinalangga nga babaye, tuman ini nga nagaralain kag indi mabaton ang pagkadula sini.
Nagalaum naman ini nga sa ila panawagan mahatagan sang hustisya ang pagkadula ni April.
Sa karun nagapadayun sa gihapon ang imbestigasyon sang Koronadal City PNP.
