KORONADAL CITY- Nagapadayon ang imbestigasyon sang mga otoridad sa nagluntad nga pagpangluthang sa isa ka empleyado sang gobyerno sa syudad sang Cotabato.
Sa interbyu sang Bombo Radyo Koronadal kay PSSUPT Rolly Octavio, hepe sang Cotabato City PNP, ginkilala ang biktima nga si Angelito Ong Cabacungan II, 51-anyos, residente sang Happy Homes Subdivision, Brgy RH 10, Cotabato city kag empleyado sang Department of Agrarian Reform Region 12.
Nagagwa sa imbestigasyon sang mga kapulisan nga pasulod na kuntani ang biktima sa puluy-an sini sakay sa kulay grey sini nga Toyota Vios kagabi, sang gilayon suno pa ini nga ginpalapitan sang suspek kag gintiro sang 3 ka bes.
Naka-angkon sang igo ang biktima sa bahin sang iya panga apang nasarangan man suno pa sini nga magmaneho sang salakyan padulong sa ospital.
Narekober naman sang SOCO sa crime scene ang 3 ka bala sang cal. 45 nga armas nga ginusar sa pagpangluthang sa biktima.
Sa karon, padayon pa nga ginobserbaran ang kahimtangan sang biktima.
Samtang, ginahibalo naman sang mga otoridad kun ano ang motibo kag kun sin-o ang yara sa likod sang pagpangluthang sa nasambit nga empleyado sang DAR 12.
