KORONADAL CITY – Padayon ang pagpang-awhag sang city government sang Koronadal sa mga pumuluyo nga magpartisipar, buylugan kag mag-enjoy sa Pyesta Kolondatal 2018 kadungan sang opisyal nga pagsugod subong nga adlaw.
Ini ang nangin panawagan ni Councilor Mark Lapidez, sa interbyu sang Bombo Radyo Koronadal.
Suno kay Lapidez, dapat nga magtambong ilabi na ang mga South Cotabateños bangud tumalagsahon lamang ang nasambit nga kayestahan nga ginapartisipar sang 9 ka foreign countries kag 4 ka mga lokal nga delegado halin sa pungsod.
Nahibaluan nga subong nga adlaw, Agosto 11, 2018 magaumpisa ang nasambit nga kapyestahan kag magatakop sa Agost 18, 2018.
Samtang ginpa-athag man ni Councilor Lapidez nga tuman na ka excited ang mga pumuluyo ilabi na ang mga estudyante bangud ini naman ang ti-on agud makahalubilo sa iban nga lahi ukon rasa.
Balantayan man ang mga nagkalain-lain nga kultura nga ipakita sang mga foreign delegates gikan sa Estonia, Romania, South Korea, Thailand, Caribbean Island, Tahiti, Malaysia, Indonesia kag South Africa sa ila nga performaces.
Dako naman ang pagpati ni Councilor Lapidez nga makabulig ang paghiwat sang Pyesta Kolon Datal sa ekonomiya sang syudad sang Koronadal.
