KORONADAL CITY – Nagsungka sa militar ang anom ka miyembro sang Bangsamoro Islamic Freedom Fighters (BIFF) kalakip na ang ila deputy brigade commander nga suno pa naga-operate sa Liguasan Marsh, Pagalungan, Maguindanao.
Ini ang ginpahayag ni 6th Infantry Division spokesman Capt. Arvin John Encinas sa interbyu sang Bombo Radyo Koronadal.
Suno kay Encinas, ang mga surrenderors yara sa liderato ni Kumander Gani Saligan kun sa diin ila man ginsungka ang anom nga matag-as nga kalibre sang armas nga ginalakipan sang duha ka rocket propelled grenade (RPG), duha ka 50 caliber sniper rifles, isa ka M-14 rifle kag isa ka bolt-action sniper rifle.
Suno naman kay Dido Malawan nga amo ang deputy brigade commander sang grupo, wala na suno pa sila sang rason nga magbato sa gobyerno tunaan nga nagdesisyon sila nga magsungka.
Nagpasalamat si Capt. Encinas sa Bombo Radyo Koronadal nga nangin taytay agud mapalab-ot ang panawagan kag bulig sang gobyerno sa mga magasungka nga BIFF members.
Base sa ila datos, yara sa 24 na ang kabug-osan nga rebelde nga nagsulungka.
