KORONADAL CITY – Ginpasaka pa sang mga otoridad sa probinsiya sang North Cotabato ang alerto matapos ang natabo nga pagkapatay sang duha ka suspected bombers sa checkpoint sa banwa sang M’lang alas-3 kaina sang kaagahon.
Ini ang ginkumpirmar ni Pol. Supt. Bernard Tayong, tagpamaba sang Cotabato PNP sa interbyu sang Bombo Radyo Koronadal.
Suno kay Tayong, napatay ang ginapatihan mga bomber nga sanday Patrick Ali Saligan, 30, residente sang Brgy. Digal, Buluan, Maguindanao kag isa ka Nhords Saibo Ali, 29, residente sang Brgy. Poblacion, Datu Paglas, Maguindanao matapos nga magbato sa mga suldado nga nagapatigayon sang checkpoint sa national highway.
Magluwas nga myembro ang mga ini sang Bangsamoro Islamic Freedom Fighters (BIFF) ginahibalo pa sa subong sang mga otoridad kun may kaangtanan sa mga terorista nga Maute-ISIS ang mga napatay.
Apang, hugot naman nga ginpanginwala ni Tayong nga may nagakatabo nga recruitment sang Maute-ISIS sa probinsiya.
Kadungan sini, nagpanawagan naman ang opisyal sa mga pumuluyo sa North Cotabato kag kaiping nga probinsiya nga mangin alerto kag magbulig sa mga otoridad agud nga mapunggan ang anuman nga kalakasan ukon plano sang mga terorista.
