KORONADAL CITY- Ginpakigbahin sang isa ka Overseas Filipino Worker sa Bombo Radyo Koronadal ang kuha sini nga video sa nagluntad nga magnitude 6.9 nga linog sa Lombok, Indonesia sini nga nakaligad nga adlaw.
Suno sa OFW nga si Tatskie Ramos, halin sa T’boli South Cotabato kag 3 ka tuig na sa Indonesia kaupod sini ang iya mga katrabaho sa Lombok Epicentrum Mall makaligad ang trabaho agud nga maglagaw kun sa diin pasulod na sila sa isa ka sinehan sang gulpi na lang maghulag ang sulod sang edifisyo kag napatay ang mga suga.
Nabatyagan man suno pa nila ang amat-amat nga pagbaskog sang linog tubtob sa nagpanic na kag nagsinggitan ang mga tawo sa mall.
Sa tuman nga panic sang mga tawo ginbuka ang mga salamin sa mall agud makagwa gilayon bangud sa halos magka stampede na suno pa.
Nagpabilin suno pa sila malapit sa CR bangud mas luwas ang lugar tubtpb sa nag-untat ang linog kag nakagwa sila.
Samtang sa karun pabudlayanay sa gihapon ang signal kag pag connect sa internet bangud sa wala sa gihapon makabalik ang pila ka linya sang kuryente.
Halos 100 naman ang patay samtang 4 ka Indonesian Red Cross Volunteer ang pilason kag punuanay naman ang ospital samtang nilibo ka puluy-an ang nawasak.
