KORONADAL CITY- Naglab-ot na sa 20 ka mga puluy-an ang napagkit na naguba bangud sa pagpanalasa sang mabaskog nga hangin kag makusog nga ulan sa syudad sang Koronadal.
Sa ekslusibo nga interbyu sang Bombo Radyo Koronadal kay City Administrator kag CDRMM Officer Cyrus Jose Urbano, padayon ang paglibot sang ila nga team agud mapadulungan ang pila ka mga lugar nga apektado sang nasambit nga kalamidad.
Nahibaluan nga kadamuan sa mga nawasak nga puluy-an ang natumbahan sang dalagkuan nga mga puno.
Padayo naman ang pagtipon sang impormasyon halin sa iban pa nga mga barangay sa syudad nga tuman ka apektado sang kalamidad.
Samtang kaangot sini,. pila ka mga residente subong sa Brgy. Zone III ang ginrespondehan suno kay Kapitan Bert Hinay makaligad ginlupad ang ila mga atop kag sa bahin naman sang Brgy. Sto. Niño sini nga syudad, 5 ka mga puluy-an ang natumbahan sang puno kag naguba ang mga atop.
Sa brgy. zone II naman nagpangnutod na sang puno nga halos matumba bangud sa mabaskog nga hangin kag may yara man sang natuklap nga atop apang maswerte nga nakay-o pa.
May mga salakyan naman nga naguba makaligad matumbahan man sang puno kag maigo sang nagkalapalid nga sanga sang kahoy.
Madamo naman sang residente ang apektado sang madugay nga brownout bangud sa epekto sang malain nga paniempo makaligad maguba ang pila ka linya sang kuryente.
Samtang padayon naman ang assessment sang South Cotabato Provincial Disaster Risk Reduction and Management Council sa mga banwa sa probinsya ilabi na sa syudad sang Koronadal nga apektado sang malain nga paniempo.
