KORONADAL CITY – Bukas suno pa ang Bangsamoro Islamic Freedom Fighters (BIFF) nga makig-istorya sa gobyerno kag Moro Islamic Liberation Front (MILF).
Ini ang ginkumpirmar ni Abu Misri Mama, spokesperson sang BIFF sa interbyu sang Bombo Radyo Koronadal.
Suno kay Mama, gikan sila sa grupo sang MILF apang nagbiya lamang bangud sa indi na magkapareho ang ila nga tinutuyo rason nga imposible nga mangin maayo man ang pag-istoryahanay sang mga ini.
Apang, sa subong wala pa nagpakig-angot sa ila ang MILF matapos mapirmahan ni Pangulong Rodrigo Duterte ang Bangsamoro Organic Law (BOL).
Sa tion nga istoryahon sila ni Pangulong Rodrigo Duterte, pagabatunon man nila ini agud nga maduso man ang ila nga handum nga matabo sa Mindanao.
Kadungan sini, nagpromisa man ang BIFF nga indi pagkontrahon ang BOL kun magatuga ini sang kaayuhan sa Bangsamoro apang nagpaandam naman nga padayon nga magapangatake sa tion nga indi mangin maayo ang resulta sini.
