KORONADAL CITY – Nagapadayon ang imbestigasyon sang kapulaisan sa nagluntad nga pagpasigabong sang granada sa puluy-an ni Mayor Ramon Abalos sang Lambayong Sultan Kudarat kag Municipal Police Station pasado alas-7 kaina sang aga nga nagresulta sa pagkapilas sang utod kag pakaisa sang alkalde.
Ginkilala ang mga napilasan nga sanday Councilor Carlos Abalos, manghud sang alkalde kag Richard Abalos, pakaisa man sang opisyal kag kasamtangan nga Assistant Public Supervisor sang Lambayong.
Sa eksklusibo nga interbyu sang Bombo Radyo Koronadal kay Richard Abalos, nagaistoryahanay suno pa sila nga magpakaisa sa garahe sang balay ni Mayor Ramon sang hinali nga may naghaboy sang granada kag naglupok.
Maayo na lamang nga nag-igo malapit sa salakyan ang granada rason nga minor injuries lamang ang naangkon nila sang pakaisa sini samtang wala naman napilasan si Mayor.
Suno sa mga nakakita, riding in tandem ang mga suspek nga naghaboy sang granada sa puluy-an sang alkalde.
Pila ka minuto pagkatapos nga naglupok ang granada sa puluy-an ni Mayor Abalos, ginpalukpan naman ang atubaangan sang police station.
Dako naman ang pagpati sang pamilya Abalos nga magkaupod lamang ang mga suspek nga magkasunod nga nagpasigabong sang granada kaian sang aga.
Sa subong, ginapahugtan pa ang seguridad sa nasambit nga banwa kag ginahibalo pa sang mga otoridad ang identity sang mga suspek subong man ang motibo sang mga ini.
