KORONADAL CITY – Ginalauman subong nga adlaw ang pagbag-o sa mga committee chairmanships sa Kamara apang “very minimal” indi kasubong sang ginalauman sang kadam-an.
Ini ang ginpahayag ni 2nd District of Capiz Representative kag deputy house speaker Fredenil Castro sa eksklusibo nga interbyu sang Bombo Radyo Koronadal.
Suno kay Castro, indi maaapektuhan ang kadam-an sa chairmanship sang mga committees ukon wala sang major changes nga matabo magluwas sa pipila lamang.
Ini bangud indi luyag ni House Speaker Gloria Macapagal Arroyo nga makaangkon sang pagbalasa agud nga indi madelatar ang kasamtangan nga trabaho sang nagkalain-lain nga committee.
Kadungan sini, liwat nga gin-insister ni Castro nga super majority ang nagdesisyon sa pagbag-o sang liderato sang Kamara kag wala sang kahilabtanan diri ang iban nga tawo kasubong sang mga naguluwa sa balita.
Ginpasiguro man ni Castro nga indi maapektuhan ang mga legislative agenda ni Pangulong Rodrigo Duterte bangud ang luyag suno pa sang Kamara ang maduso ang ikaayo sang tanan.
