KORONADAL CITY – Personal grudge ang ginalantaw nga motibo sang Lutayan PNP sa pagluthang patay sa isa ka imam sa Barangay Blingkong, Lutayan, Sultan Kudarat.
Ini ang ginpahayag ni Lutayan PNP chief of police Senior Insp Herman Luna sa Bombo Radyo Koronadal kun sa diin una nga ginkilala ang biktima kay Kipo Miskinan, 60 anyos kag residente sang Brgy Miskinan sa nasambit nga banwa.
Suno kay Luna, may yara na sila sang mga suspek nga ginatutukan kag ila na ini nga ginaimbestigaran.
Nahibaloan nga isa ka igo sa likod sang iya ulo ang nangin rason sang kamatayon sang nasambit nga imam kun sa diin narekober sa crime scene ang basyo sang kalibre 45.
Madumdoman nga nagluntad ang insidente sadtong adlaw sang Sabado kun sa diin nagikan sa Tamnag gym ang biktima kaupod ang iya bata kag asawa agud magkuha sang iya pension bilang senior citizen kag ginluthang ini sang riding in tandem sa ila pagpauli.
Nakaangkon naman sang gasgas kag pilas ang iya asawa kag bata bangud sa pagkatumba sang motor sang magluntad ang pagpangluthang.
