KORONADAL CITY –Wala suno pa nagsala ang pamunuan sang Moro Islamic Liberation Front (MILF) kag Bangsamoro Transition Commision nga magabawi ang Kamara sa nagluntad sadtong Lunes antes ang SONA ni Pangulong Rodrigo Duterte.
Ini makaligad nga naratipikahan na kahapon sang kongreso ang Bangsamoro Organic Law kun sa diin pirma na lamang ni Pangulong Rodrigo Duterte ang kulang agud tigayon na ini nga mangin layi.
Sa eksklusibo nga interbyu sang Bombo Radyo Koronadal kay MILF Vice Chairman for Political Affairs kag Bangsamoro Transition Commision chairman Ghadzali Jaafar, ginkalipay nila ang ginhimo sang Kamara.
Nahangpan man nila ang natabo sadtong Lunes bangud nakahibalo sila nga magahimo sang paagi ang bag-o nga liderato sang Kamara sa pag-ratify sang BOL kag nagluntad gid ini.
Nagapabilin sila nga positibo kag kumpiyansa nga mapatuman ini bangud sa promisa ni Pangulong Duterte.
Sa subong dapat nga andaman man ang plebesito antes magtakop ang 2018.
Ginalauman nga pag-abot sa bulan sang Enero ukon Pebrero sa madason nga tuig, madihon na ang provisional government nga pagatawgon naman nga Bangsamoro Transition Authority.
