KORONADAL CITY- Gindunganan sang hublag protesta sang yara sa 200 ka mga raliyesta halin sa South Central Mindanao ang State of the Nation Address ni Pres. Rodrigo Duterte subong nga adlaw sa atubang mismo sang DepEd Regional Office 12.
Nahibaluan nga bilang kabahin sang hublag protesta, ginhaya mismo sang mga raliyesta sa atubang sang talatapan sang DepEd 12 ang bangkay sang ila kaupod nga si Pakingan Gantangan, 54, residente sang Kalamansig Sultan Kudarat nga napatay sa tunga sang rally makaligad gin atake sang balatian bangud sa tuman kainit nga paniempo.
Sa interbyu sang Bombo Radyo Koronadal kay Timothy Romero tagpamaba sang Center for Lumad Advocacy Network (CLAN) nga panawagan nila amuh ang untaton na sang Duterte administration kag sang DepEd ang pagpang-atake suno pa sa mga Lumad kag hatagan na sang permit to operate ang 14 nila ka mga buluthuan sa South Central Mindanao.
Dugang pa sini nga ang presensya sang bangkay sang ila kaupod sa atubang sang talatapan sang DepEd 12 ang magasirbe nga wake up call suno pa sa ila nga mga panawagan nga maka operate ang Lumad Schools.
Kun madumduman ginpauntat sa pag operate ang MISFI academy bangud sa gina alegar nga ginatudluan sang mga ini ang ila estudyante nga mag-rebelde batuk sa gobyerno.
