KORONADAL CITY – Positibo ang panan-awan sang Muslim community sa Mindanao sa pag-aprubar sang congressional bicameral conference
committee sa reconciled version sang Bangsamoro Basic Law (BBL) nga gintawag bilang Organic Law for the Bangsamoro in Autonomous Region in Muslim Mindanao (BARMM) ukon Bangsamoro Organic Law.
Ini ang ginpahayag ni Sultan Mutalib Sambuto, ang Muslim affairs chief sang South Cotabato sa interbyu sang Bombo Radyo Koronadal.
Suno kay Sultan Sambuto, ginakalipay nila nga malapit na makab-ot ang kalinong nga madugay na ginahandum para sa Mindanao.
Sigurado suno pa nga makaangkon sang dako nga selebrasyon ang Muslim community bilang pagpasalamat para diri.
Apang, sa tion nga tigayon na ini nga mapirmahan ni Pangulong Duterte, dapat nga ipakita sang kada lider sang bag-o nga bangsamoro entity nga magatal-os sa ARMM nga nga tampad sila sa pagserbisyo, indi dapat mangin ningas cogon lamang kag magpabilin nga modelo para sa bwas damlag sang masunod nga henerasyon sang bangsamoro.
Hingyo man ni Sambuto sa iban nga grupo nga indi sa Bangsamoro Organic Law nga mangin bukas sa pagpamati agud nga maistoryahan ang luyag nila nga matabo agud nga wala na sang mangin problema ukon kalakasan nga matabo sa Mindanao.
Samtang, subong pa lamang nagapasalamat na sang dako ang Muslim community kay Pangulong Rodrigo Duterte bangud nagalaum sila nga isa ini sa maayo nga balita nga ilakip sini sa iya nga State of the Nation Address (SONA).
