KORONADAL CITY – Naghingyo sang bulig sa Bombo Radyo Koronadal ang bana sang isa ka OFW nga ginmaltrato kag ginpapreso sang iya amo sa Riyadh Saudi Arabia.
Ginkilala ang OFW nga si Marylyn Ugcal, 42 anyos, nga residente sang Brgy. Tubeng, Tupi, South Cotabato.
Sa interbyu sang Bombo Radyo Koronadal sa iya bana nga si Danilo Ugcal, Disyembre 6, 2016 nagbiya sa pungsod ang iya asawa agud magtrabaho sa Saudi apang wala sini ginalauman nga mangin kalbaryo ang iya nga dangtan didto.
Suno kay Danilo, mag-isa ka bulan na nga indi nila makontak ang iya asawa bangud nga ginpreso siya matapos nga ginpasibangdan sang iya employer nga nagpangawat sang bracelet.
Nagapati suno pa si Ugcal nga ginhimu-himuan lang siya sang sala sang iya employer ang pagpasibangud sa iya asawa.
Nagreklamo na suno pa siya sa agency ni Marylyn nga Florida Resources and Placement Corporation apang wala man sila sang ginahimo nga aksiyon rason nga naghingyo sila sang bulig sa Bombo Radyo.
Luyag suno pa ni Danilo nga makapauli lang sang luwas ang iya nga asawa.
Nahibaluan nga may duha ka kabataan ang mag-asawa nga Ugcal.
