KORONADAL CITY – Yara na sa kustodiya sang mga otoridad ang isa ka aktibo nga police officer kag 2 pa nga mga drug suspects matapos nga maarestar sa ginpatigayon nga “One time, Big time” anti-drug operation sa banwa sang Polomolok, South Cotabato.
Ginkilala ni Chief Supt. Marcelo Morales, PNP -12 Regional Director ang naarestar ngga pulis nga si PO2 Ernie M Sagabay nga nakadestino sa Polomolok PNP.
Nadakpan ang pulis sa puluy-an sang drug suspect nga si Reniel Nilong sa Barangay Poblacion sa nasambit nga banwa.
Narekober ang indi lisensyado nga armas luthang si Sagabay kag natalana nga magpaidalom sa drug test.
Samtang, ang 2 pa ka naarestar amo sanday Adam Omar, 41-anyos, kun sa diin narekober sa posisyopn sini ang ginapatihan nga shabu, drug paraphernalia kag rifle grenade. Naarestar man si April Rose Mollino nga residente sang taga-General Santos City.
Sa separar nga raid, nadiskubrihan naman sang mga otoridad ang isa ka abandonado nga puluy-an sa Sitio Kulube, Barangay Lapu, Polomolok, South Cotabato nga ginalegar hideout sang Dawlah-Islamiyah-Maguid Subgroup nga anay Ansar-Al Khilafa Philippines, isa ka ISIS link group sa Mindanao.
Narekober sa lugar ang mga dokumento angot sa operasyon sang grupo, mga live ammunition sang M 16 armalite rifle, mga fatigue uniforms kag mga flags sang ISIS.
