KORONADAL CITY- Nagdangop sa waragwagan sang Bombo Radyo Koronadal ang amay sang isa ka Overseas Filipino Worker nga kasamtangan nga yara subong sa Tabarjal,al-jouf sa pungsod Saudi Arabia nga naga eksperyensya sang pagpang maltratar.
Sa interbyu sang Bombo Radyo Koronadal kay Ruben Sabal, ang bata sini amuh si Jane Sabal, 48 anyos nga residente sang Titulok, Bagumbayan Sultan Kudarat nga 1 ka tuig kag tunga pa lang nga nagatrabaho sa nasambit nga pungsod.
Suno sa nasambit nga amay, nagakabalaka na ini bangud nagareklamo ang iya bata nga tuman ka abusado ang iya nga employer nga ginkilala kay Najah Saleh Alsharari kun sa diin wala suno pa ini ginahatagan sang ensakto nga pahuway kag luwas sina ginapasa pasa man ini sa mga nagkalain lain nga amo agud nga magtrabaho.
Nagareklamo na ang OFW nga indi na sini masarangan kun sa diin wala man ginahatagan sang nagakaigo nga sweldo.
Dismayado si Ruben Sabal, ang amay sang Overseas Filipino Worker sa Saudi Arabia nga biktima sang pagpangmaltratar sang iya mga amo kag wala sang ensakto nga pahuway nga wala gid sila sang nabaton nga sabat halin sa ahensya sang iya nga bata.
Nagpabutyag ini sang kalain sang buot pinaagi sa Bombo Radyo Koronadal bangud sa wala aksyon halin sa ahensya sang iya bata nga amuh suno pa ang Ellisar manpower services kag ang counterpart sini sa Saudi nga amuh ang Alniger Abdulrahman.
Sa karun nagalaum ini nga pinaagi sa Bombo makapauli ang iya nga bata kag masolusyunan ang problema sini.
Nahibaluan nga tuman ka pigado ang pangabuhi nga ginhalinan sang nasambit nga OFW gani ini siya kun tani ang ginasaligan sang iya nga pamilya.
