KORONADAL CITY – Tatlo ka mga banwa sa probinsiya sang South Cotabato ang apektado sang landslide kag flash flood tuga sang wala untat nga pagbubo sang ulan.
Ini ang ginkumpirmar ni Provincial Disaster Risk Reduction and Management Office (PDRRMO) chief Mila Lorca sa interbyu sang Bombo Radyo Koronadal.
Suno kay Lorca, magluwas sa napagkit nga pagkatiphag sang duta saa Barangay Palo 19, Tampakan, South Cotabato may napagkit man man nga landslide sa Barangay Poblacion sa banwa sang Tboli.
Gilayon naman nga nasolusyonan ang problema sang mga residente sa lugar kun diin sa subong passable nga ang mga dalan nga natabunan sang natiphag nga duta.
Samtang, may nagluntad naman nga flash flood sa Barangay Canajay, Surallah, South Cotabato bangud sa pag-awas sang tubig sa suba nga naglab-ot sa provincial road.
Nagpasalamat naman ang opisyal nga apisar may napagkit nga mga kalamidad sa probinsiya, wala man ini nagtuga sang dako nga damyos.
Sa subong, nagapanawagan na lamang ang opisyal sa mga pumuluyo nga mangin alerto kag mamati sa mga advisories sa Radyo agud nga makapreparar batuk sa kapahamakan labi na sa posibilidad nga pagpanalasa sang panibag-o nga bagyo sa pungsod.
