KORONADAL CITY – Wala sang dapat mangin accountable sa postponement sang peace negotation sa tunga sang gobyerno kag CPP-NDF kundi ang Duterte Administration.
Ini ang ginpahayag ni Bayan Muna Partylist Representative Carlos Isagani Zarate sa interbyu sang Bombo Radyo Koronadal.
Suno kay Zarate kun may yara man sang dapat basulon sa liwat nga pagkadelatar sang peace talks ini wala sang iban kundi si President Duterte.
Nagakadapat man suno pa nga ipatigayon sa isa ka foreign neutral venue ang negosasyon, kun sa diin una na nga ginpahayag ni Duterte nga luyag sini nga sa pungsod ipatigayon ang peace talks.
Pagpa-athag pa sini nga dapat maka-angkon sang political settlement agud nga malikawan ang anuman nga gyera kag kinahanglan nga maresume na ini sa pinakamadali nga tini-on.
Kwestunable man suno pa ang sinseridad sang administrasyon ni Duterte bangud may mga nahisgutan na ang 2 ka bahin apang liwat naman nga ginpostpone sang pangulo ang negosasyon nga natalana kuntani peace talks sang Hunyo 28.
Maluwas sini, madamo na suno pa sang ginpromisa ang pangulo humalin sang nagpamuno ini ang wala matuman.
