KORONADAL CITY – Personal nga naghingyo sang bulig sa Bombo Radyo Koronadal ang iloy sang isa ka maltreated OFW nga suno pa ginapreso kag wala ginaswelduhan sa Jeddah, Saudi Arabia.
Ginkilala ang OFW nga si Cristy Cabaluna, single mom nga may duha ka bata nga residente sang Brgy. Sajaneba, Sto. Niño, South Cotabato.
Suno sa iya iloy nga si Veblyn Cabaluna, sang March 21, 2017 pa naglakat ang iya bata nga si Cristy apang makaisa ka bes lamang ini nga ginswelduhan sang amo.
Naluoy na siya sa bata sini bangud wala ginapakaon sang maayo, wala ginapagamit sang cellphone, ginapatrabaho sa nagkalain-lain nga puluy-an sang iya employer, ginapreso kag wala ginaswelduhan.
Nahibaluan lamang suno pa ni Ginang Veblyn ang balita sang may nagtawag sa iya nga naluoy sa sitwasyon sang bata sini.
Naghingyo na suno pa siya sang bulig sa POEA kag OWWA apang ginapalaum lamang siya rason nga naghingyo ini sang bulig sa Bombo Radyo.
Sa subong, nagapanawagan si Ginang Veblyn nga buligan ang iya bata nga makapauli sang buhi para sa duha ka bata sini.
