KORONADAL CITY – Patay ang ginakabig nga bigtime drug user kag notoryus nga pusher sa ginpatigayon nga anti-drug operation sa bahin sang Prk. Usman, Brgy. Kalawag 3, Isulan, Sultan Kudarat.
Ginkilala ang suspek nga si Melchor Lapiad nga residente sang nasambit nga lugar.
Sa ginpalab-ot nga impormasyon ni Bombo correspondent Larry Geronio sa Bombo Radyo Koronadal, ginpatigayon ang operasyon takna alas 8:05 kagab-i kun sa diin naka-transaksyon sini ang pulis nga nagpakuno-kuno nga poseur buyer.
Ginsugod sang Isulan PNP ang balay ni Lapiad makaligad ang transaksyon apang nagbato ini rason nga nagbalos sang lupok ang mga otoridad.
Nakaangkon sang mga igo sang bala si Lapiad sa iya dughan, tiil, abaga, kag tiyan nga nangin tunaan sang iya hinanali nga kamatayon.
Nakuha nagikan sa iya ang tatlo ka dalagko nga sachet sang droga, home-made caliber 45 nga armas kag mga bala.
Nahibaloan nga sa Isulan kag kaiping nga kabanwahanan sa Sultan Kudarat ang area of operation sini kag nagakuha sang suplay sang droga sa Cotabato.
