KORONADAL CITY – Yara na sa kustodiya subong sang mga otoridad ang 13 ka mga matag-as nga kalibre sang armas luthang kag mga bala matapos nga ginsungka sang pamilya sang anay Barangay Chairman sa probinsiya sang North Cotabato.
Suno kay Capt. Randy Llunar, Civil Military Operation Officer sang 901st Brigade, ginsungka sang mga himata ni ex-barangay Tagbac Chairman Reinado Dinampo ang mga armas kasubong sang M14, M16, M1 Garan, Carbine, Grenade Launcher, .45 pistol kag ginatos ka mga bala.
Gintago suno pa ang nasambit nga mga loose firearms sa ancestral house sang pamilya Dinampo.
Nahibaluan nga sang buhi pa ang nasambit nga opisyal, ginagamit ang mga armas batuk sa mga rebelde.
Kag bangud sa pagpamahog sang New People’s Army nga kuhaon ang mga ini, ginsungka ini sang pamilya Dinampo.
Madumduman nga sang nagligad nga tuig ginsulod sang mga rebelde ang puluy-an sang nasambit nga barangay kapitan sa Sitio Pinantao, Barangay Sudapin Kidapawan city kag ginkuha ang mga ginatago sini nga mga armas.
Wala naman sang pagaatubangon nga kaso ang pamilya Dinampo bangud sa boluntaryo nila nga ginsungka ang nasambit nga mga armas.
