KORONADAL CITY-Nagpahayag sang pagkadismaya si Bishop Dinualdo Gutierrez sang Diocese of Marbel angot sa kontrobersyal nga pagtawag ni Pres. Rodrigo Duterte nga estupido ang Diyos sang mga katoliko.
Sa esklusibo nga interbyu sang Bombo Radyo Koronadal sa obispo, nagasobrahan na ang presidente sa iya mga ginabuy-an nga mga tinaga kun sa diin base sa Exodus 20:7 indi dapat usaron ang pangalan sang Diyos sa mga wala pulos nga butang kag base man sa Deuteronomy 5:11 indi man dapat nga usaron ang pangalan sang Diyos para sa malain nga mga tinutuyo.
Gin-insister man sang Obispo nga mali nga tawagon nga estupido ang Diyos kag sa baylo nga tawgon suno pa sang presidente nga estupido ang Diyos mas maayo nga magpasalamat na lang ini sa Diyos.
Samtang sa pihak sang kontrobersyal nga pahayag sang presidente gin-awhag ni Bishop Gutierrez ang mga tumuluo nga ipangamuyo nalang si Duterte bangud sya sa gihapon ang presidente sang pungsod.
