KORONADAL CITY – Magapatigayon sang imbestigasyon ang Commission on Human Rights (CHR-12) kaangot sa reklamo sang mga babaye nga ginpahublas sang Jail guards sang nagbisita sa South Cotabato Detention and Rehabilitation Center.
Ini ang ginpasiguro ni CHR-12 Regional Director Atty. Erlan Deluvio sa interbyu sang Bombo Radyo Koronadal.
Suno kay Deluvio, pagahibaluon nila ang rason sang pamunuan sang South Cotabato Provincial Jail kun ngaa ginpatuman ang nasambit nga kamanduan kag kun dapat bala nga ini ang ipadayon.
Aminado si Deluvio nga wala naman sang high profile inmate sa jail kag indi man critical ang sitwasyon sa subong.
Ginpahayag pa ni Deluvio nga irregular ang pagpatuman sini bangud kun wala sang tama nga guidelines, mahimo nga malapas ang kinamatarong sang mga kababaihan nga nagabisita sa iya mga himata nga napreso.
Samtang, nagpanindugan man si Jail Warden Juan Lansaderas nga madugay na nila nga ginapatuman ang nasambit nga polisa agud nga masiguro nga wala sang mapasulod nga droga ukon anuman nga iligal nga kontrabando sa sulod sang jail.
Madumduman nga nagpalapit sa Bombo Radyo Koronadal ang isa ka ginang angot sa naeksperiensiyahan nila nga paglapas sa tawhanong kinamatarong sang mga nagabisita sa provincial Jail.
