KORONADAL CITY – Ginaistoryahan subong ang pinasahe nga stratehiya sang isa manunudlo kag nagatindog nga teacher incharge sang Lower Tinago Elementary School sa Barangay Tinago, Norala, South Cotabato agud mabuligan ang ila nga mga estudyante.
Sa eksklusibo nga interbyu sang Bombo Radyo Koronadal kay Richard Padernal, ginpahayag sini nga antes pa man siya nagsugod sa pagtudlo sa Lower Tinago, ginpadulungan niya na ang mga puluy-an sang mga IP’s sa Sitio Bangkay agud awhagon nga mag-eskwela apisar nga malayo ang eskwelahan sa ila nga ginaistaran.
Sa una nga adlaw sang pagtudlo sini, naglibot siya sa 6 ka mga classroom kag namutikan sini nga nagabukas na sang balon nga kan-on ang mga estudyante sa recess time pa lamang kag wala sang mga sud-an.
Iya pa daw nga ginsaway nga sa udto na magkaon apang nagreklamo ang mga estudyante nga nagutom na sila bangud ang balon nila nga kan-on pamahaw kag panyaga na gali.
Bangud sini, natandog ang balatyagon ni Padernal kag gin-awhag ang mga estudyante kag ginikanan nga magdala sang ila mga produkto sa eskwelahan.
Ang mga produkto nga ini ang ginadala ni Padernal sa Purok Garido, Barangay Dumaguil, kun sa diin siya nagapuyo kag iya ginabaligya.
Ang bili sang nasambit nga mga produkto nga utanon ang iya naman ginabakal sang bugas kag itlog pagka-bwas kag ginadala sa eskwelahan agud may kaunon ang mga kabataan.
Kag ang ini nga paagi ukon stratehiya ang ginhingadlan niya nga “Project Barter”
Gin-implementar ang project barter sa Lower Tinago Elementary School agud nga mahagan-hagan ang pag-absent sang mga estudyante, masolusyonan ang kagutom, maka-income ang mga kabataan kag ma-encourage ang mga ginikanan nga magtanum sang anuman nga produkto sa ila nga ugsaran.
suno kay Padernal, nakit-an niya ang kabudlay sang mga estudyante nga nagalakat sang masobra 3 ka kilometro halin sa ila puluy-an pakadto sa eskwelahan rason nga pamaagi niya man ini agud nga makabulig sa iya.
Gin-athag man ni Padernal nga ang ini nga stratehiya ang ipa nga gin-implementar bangud nakita niya sa mga kabataan nga pigado ang iya man nga kaagi sang estudyante pa lamang ini.
Nahibaluan nga may yara sang 115 ka enrolled nga estudyante sa amo nga buluthuan.
Apang, sa pagchekyar ni Padernal madamo pa sang mga estudyante nga nag-untat na sa pagtuon bangud sa kabudlay sang ila nga sitwasyon.
Samtang, nagpasalamat man si Padernal sa positibo nga response kag reaksiyon sang mga pumuluyo sa Project Barter nga gin-implementar sini sa ila nga buluthuan agud mabuligan ang mga estudyante nga IPs.
