KORONADAL CITY – Wala na nakalab-ot pa nga buhi sa balay bululngan ang mag-utod nga sakay sang motorsiklo matapos nga mabunggo sang pick-up truck sa banwa sang Surallah, South Cotabato.
Ginkilala ang mga napatay nga sanday Jeffrey Pabugas Porcadilla, 19-anyos kag Jessica Porcadilla, 17-anyos, nagabutho sa Moloy Integrated School kag lunsay residente sang Barangay Duengas sang nasambit nga banwa.
Nahibaluan nga ginamaneho ni Jeffrey ang motorsiklo angkas ang utod sini nga si Jessica humalin sa direksyon sang Surallah padulong sa Sto. Niño, South Cotabato.
Nagliko suno pa sa wala nga bahin sang dalan ang ginasakyan nila nga motorsiklo sang aksidente nga nabunggian sang Hilux pick up truck nga may plate number MEN 304 nga ginamaneho ni Angelo Barroso Teofilo, 39-anyos nga nakasunod sa ila.
Nag-angkon sang malala nga pilas ang mga biktima nga gintunaan sang gilayon nga pagkamatay sini.
Sa subong, padayon ang ginahimo nga imbestigasyon sang kapulisan sa nagluntad nga aksidente.
