KORONADAL CITY – Nagapadayon ang monitoring sang mga otoridad sa mga entry points labi na sa mga coastal areas sang SOCKSARGEN Region agud nga indi makasulod ang mga undocumented Indonesian nationals nga ginapatihan mga terorista.
Ini ang ginpasiguro ni Police Chief Supt. Marcelo Morales, Regional Director sang PNP-12 sa interbyu sang Bombo Radyo Koronadal.
Suno kay Gen. Morales, mas pahugtan nila subong ang seguridad sa mga coastlines kaupod ang nagkalain-lain nga maritime law enforcement agencies, AFP kag inter-community agud nga indi makasulod pa ang mga terorista gikan sa Indonesia nga ginapatihan nga nagasulod sa Mindanao.
Gin-ako man ni Morales nga madamo na sila sang naarestar nga mga Indonesian nationals nga nagapakuno-kuno mga smugglers indi lamang sa General Santos City kundi mangin sa Glan, Saranggani province kag Palimbang, Sultan Kudarat.
Kalakip sa mga naarestar sang mga ini ang Indonesian terrorist nga si Musola Rasim alyas Abu Amar nga involbado sa Bali bombing.
