KORONADAL CITY- Ginpahayag ni Department of Agriculture secretary Manny Piñol ang iya nga pagkadismaya sa kasamtangan nga sistema sang Pantawid Pamilyang Pilipino Program ukon 4P’s sa pungsod.
Sa pagbisita sini sa probinsya sang South Cotabato subong nga adlaw agud nga magpanagtag sang Post-Harvest facilities sa banwa sang Tupi, wala na mapunggan ni Sec. Piñol ang kaugalingon kun diin gin-insister sini nga dapat tal-usan ang sistema sang 4P’s sa pungsod nga ginatudluan lamang mangin tamad ang mga Pilipino.
Suno kay Piñol madamo sang mga benepisyaryo sang 4P’s ang nagatambay na lamang sa puluy-an kag nagahampang sang Tong-its samtang nagahulat sang ila nga mga ATM cards.
Gin-insister pa sini nga ang reporma sa nasambit nga programa kun diin dapat nga hatagan ang mga ini sang livelihood program nga indi pagkunsentihon ang katamaran kasubong sang pag-atipan sang mga sapat kag pagtanum agud nga makaangkon sang produkto nga mahimo makuhaan sang income.
Plano naman nga idul-ong ni sec. Piñol sa kongreso kag senado ang reporma sa 4P’s bangud masayang lamang ang masobra P70 bilyones nga pondo sang gobyerno para sa nasambit nga programa kada tuig.
