KORONADAL CITY – Yara na sa punerarya ang bangkay sang suspek sa pagpanglugos-patay sa 5 yrs old nga bata nga babaye sa banwa sang Tampakan, South Cotabato matapos nga maluthangan sang chief of police bangud sa hana nga pag-agaw sang armas luthang sang babaye nga imbestigador.
Ini ang ginkumpirmar ni PSI Rafael Banggay Jr., hepe sang Tampakan PNP sa interbyu sang Bombo Radyo Koronadal.
Suno kay PSI Banggay, samtang ginapaidalom sa booking process ang suspek nga si Sandro Ugdamen residente sang Barangay Poblacion sa nasambit nga banwa, ginhana sini nga agawon ang armas sang imbestigador nga pulis rason nga ginluthang niya ini agud nga e-neutralize.
Naigo sa dughan ang suspek nga gindala pa sa South Cotabato Provincial Hospital apang ginabawian man sang kabuhi.
Depensa ni Banggay, gab-i nila ginpatigayon ang boooking procedure sa suspek bangud sa posibilidad nga kuyugon ini sang mga tawo sa police station.
Aminado si Banggay nga may criminal instinct ang suspek rason nga wala sila nangin kampante.
Madumduman nga naarestar ang suspek sa Alabel, Saranggani Province sang gintingob nga pwersa sang Sarangani PNP kag Tampakan Municipal Police Station nga lango pa sa droga.
Gindala ini kahapon sa Tampakan Municipal Police Station kag kagab-i natabo ang hana sini nga pagpang-agaw sang armas tubtob nga napatay ini.
Samtang, wala man lubos nga malipay ang iloy sang baiktima nga ginlugos-patay sang suspek sa kamatayon sini.
Nahatagan man daw sang hustisya ang kamatayon sang iya bata apang indi niya mahatag ang kapatawaran sa suspek.
Kun madumduman nasapwan na lamang ang bangkay sang biktima sa isa ka buho malapit sa plantasyon sang kapayas sa ila nga lugar.
Kahapon man sang pormal na nga ginpasaka ang kaso nga rape with homicide sa suspek.
