KORONADAL CITY – Nadugangan pa ang numero sang mga napatay sa nagluntad sa serye sang engkwentro sang militar batuk sa mga myembro sang Bangsamoro Islamic Freedom Fighters (BIFF) sa mga probinsiya sang Maguindanao kag North Cotabato.
Ini ang ginkumpirmar ni 6th ID spokesperson Capt. Arvin Encinas sa interbyu sang Bombo Radyo Koronadal.
Suno kay Encinas, naglab-ot na sa 20 ang napatay nga BIFF sa ginpatigayon nga law enforcement operation sang Joint Task Force Central.
Samtang, nagapabilin anaman nga isa lamang ang casualty sa bahin sang mga suldado nga ginkilala kay Pfc. Garry Quitor, taga Pigcawayan, North Cotabato kag nadesignar sa 33rd Infantry Battalion Philippine Army.
Kun madumduman, ginbombahan sang tactical squadron sang Philippine Air Force gamit ang duha ka Agusta helicopter gunship kag mortar fires gikan sa 7th Field Artillery Battalion Phil. Army ang bomb factory sang BIFF-ISIS inspired group kag DAESH terrorist group sa boundary sang Maguindanao kag North Cotabato.
Resulta man ini sang pagkaaresto sang mag-asawa nga bomb-expert sang BIFF kag pagkarekober sang mga improvised explosive device (IEDs) kag matag-as nga kalibre sang armas luthang kag mga bala.
Tubtob sa subong padayon man ang paglagas sang Joint Task Force Central sa grupo ni Kumander Abu Wahid sang DAESH, Shiek Esmail Abdulmalik alyas Kumander Abu Toraifie ang Emir sang BIFF-ISIS inspired group, lakip na ang mga dumuluong nga terorista sa Liguasan Delta.
Samtang, nagapdayona man ang clearing operation sang militar kun diin nagsaka pa gid ang numero sang mga sibilyan nga nagbakwit sa mga apektado nga lugar.
