KORONADAL CITY- Nagresulta sa kamatayon sang 2 ka mga rebelde kag pagkapilas sang 2 naman ka mga suldado ang liwat nga pag ibwal sang engkwentro sa tunga sang military kag New People’s Army sa boundary sang 3 ka mga barangay sa banwa sang T’boli, South Cotabato.
Ini ang ginkumpirmar ni PCI Ramil Villagracia hepe sang T’boli PNP sa interbyu sang Bombo Radyo Koronadal.
Suno kay Villagracia, samtang nagapatrolya ang mga katapo sang Alpha Company sang 27th IB, Philippine Army nga ginapamunuan ni
Lt. Jean Adrian Gesani sa boundary sang Barangay Mongocayo, Basag kag Maan naka engkwentro nila ang 4 ka grupo sang mga rebelde.
Ginapamunuan ini nanday Kumander Brigol, Kumander Rayray, Kumander Ustan, kag Kumander Alfie nga naghugpong batuk sa mga suldado.
Duha ang napagkit nga patay sa mga rebelde kag ginahibalo pa ang mga identity samtang gilayon naman nga gindangat sa ospital ang 2 ka mga pilason nga mga suldado nga ginkilala kanday Corporal Reynande Ramos kag Corporal Miskah Ainaga.
Nagdugay naman sang masobra 3 ka oras ang engkwentro kun sa diin gilayon nga nagpalagyo ang mga NPA makaligad nga mag-abot ang air support sang mga suldado.
Nagbakwit naman ang yara sa masobra 100 ka pamilya sa nasambit nga barangay sa kahadlok nga malamita sa engwkentro.
