KORONADAL CITY- Ginabulubanta nga yara sa P200,000 ang inisyal nga damyos nga napagkit sa nagluntad nga sunog sa bahin sang Purok Sampaguita, Brgy. Saravia syudad sang Koronadal.
Sa interbyu sang Bombo Radyo Koronadal kay FO2 Alexander Alisogay, ginhimo sa light materials ang puluy-an ni Rona Barte, isang manunudlo sang Marbel 8 Elementary School.
Base sa inisyal nga imbestigasyon, yara sa puluy-an sang ila kaingod balay si Barte kaupod ang iya nga bata agud makikaon kun tani kag makikaon kag maglantaw sang telebisyon pasado alas 7 kagab-i sang gulpi na lamang ini makabati sang lupok halin sa ila puluy-an nga ginkaon sang kalayo.
Gilayon naman nga ginresponderan sang BFP kag gindeklarar nga fireout sa sulod sang 10 ka minuto.
Isa sa mga ginatudlo nga kabangdanan sang sunog amuh ang ginpabay-an nga kandila nga nakasindi sa estatwa sang Sto. Niño.
Nahbaluan nga 2 ka semana na nga wala sang kuryente ang puluy-an ni Barte kag natalana kun tani nga ipaidalum sa inspeksyon sang Socoteco-II.
Nagpanic naman si Barte bangud wala sini nahibaluan kun ano ang iya himuon subong.
Nasalbar na lamang sini ang iya nga cellphone kag 7 anyos nga bata.
Nahibaluan nga nagatrabaho sa Manila ang mister sini.
Ini na ang ikaduha nga insidente sang sunog nga napagkit sa sulod lamang sang isa ka adlaw makaligad nga nasunog ang isa ka stall sa Koronadal City Public Market pasado alas 11 kahapon sang udto.
