KORONADAL CITY – Nagapadayon pa ang clearing operations sang mga otoridad kaangot sa nasapwan nga improvised explosive device sa isa ka multicab sa Guindulungan, Maguindanao.
Sa interbyu sang Bombo Radyo Koronadal kay Capt. John Arvin Encinas, tagpamaba sang 6th Infantry Division sang Philippine Army, padayon ang ila maid-id nga imbestigasyon kaangot sa nasambit nga eksplosibo nga nagtuga sang kahadlok sa mga biyahero kag mga pumuluyo sa nasambit nga lugar.
Ginkakas naman sang opisyal ang kabalaka sang publiko bangud padayon ang ila monitoring agud matapna ang pagtanom sang IEDs sang mga rebelde nga grupo.
Una nga ginatudlo ang Bangsamoro Islamic Freedom Fighters nga yara sa likod sang pagbutang sang nasambit nga IED nga kabahin sang ila retaliation sa ginpatigayon nga military operations sa Liguasan Marsh nga ginkapatay sang 15 ka katapo sang mga ini kagg nagresulta sa pagkadakop sa 2 ka mga bomb makers nga sanday Ustadz Anwar Ali, kag asawa sini nga si Asnaya Ali.
